Բարեկամության այգին շատ ավելին է, քան պարզապես զբոսայգի. այն սպորտային և մշակութային միջոցառումների և ծրագրերի հարթակ է տարբեր տարիքի և մասնագիտությունների մարդկանց համար: Այստեղ մարդիկ կարող են հավաքվել՝ տարատեսակ սպորտային միջոցառումների, այդ թվում՝ բացօթյա մարզումների, սքեյթբորդինգի և BMX-ի պարապմունքների մասնակցելու համար: Այստեղ նաև անցնում են մշակութային տարատեսակ միջոցառումներ, այդ թվում՝ փառատոներ և բարեգործական մարաթոններ: Այգում ստեղծված է բացօթյա մարզումների համար նախատեսված բացառիկ հարթակ: Այն թույլ է տալիս միասին մարզվել՝ անկախ տարիքից ու սեռից: Այս հարթակը հարմար է նաև բուժական-կանխարգելիչ վարժությունների համար: 

Այգին սքեյթբորդինգի և BMX-ի երկրպագուների հանդիպման վայր է, իսկ պարբերաբար անցկացվող վարպետության դասերը և ցուցադրական մարզանքները նպատակ ունեն երիտասարդ սերնդին խրախուսել միանալ այս նոր մշակույթին: Բարեկամության այգում անցկացվող սիրված միջոցառումներից է գիշերային հեծանվարշավը: Թեմատիկ «հեծանվային գիշերները» նվիրվում են որոշակի պատմական, ճարտարապետական, քաղաքային, գրական կամ բնապահպանական թեմայի՝ սպորտը և ճանաչողական փորձառությունը համադրելով գիշերային տեսարանները վայելելու հաճույքի հետ: Այս միջոցառումը մեկ սպորտային իրադարձության շրջանակում միավորում է բոլոր մշակութային ինստիտուտները և քաղաքային տարածքները՝ մասնակիցներին թույլ տալով ազատ ընտրությամբ շրջել արշավի երթուղում ներառված վայրերով: 

Եվ վերջապես՝ այգում է անցկացվում նաև Գյումրիի առաջին բարեգործական մարաթոնը, որի նպատակը քաղաքի սպորտային միջոցառումները վերսկսելն է՝ միևնույն ժամանակ զարգացնելով հանգանակությունների մշակույթը: Մարաթոնն սկսվում և ավարտվում է Բարեկամության այգու տարածքում և խրախուսում է վազորդներին միանալ բարեգործական մարաթոնի մասնակիցներին՝ իրենց անցած կիլոմետրերին հավելյալ «արժեք» ավելացնելով: Այս միջոցառումը միավորում է ամբողջ քաղաքը՝ այն դարձնելով մեկ միասնական էկոհամակարգ, և խրախուսում է բնակիչներին ծանոթանալ քաղաքի կենտրոնից դուրս գտնվող այգուն: